Senkyèm edisyon Konbit Soup Joumou : selebre libète nan yon bòl soup

Senkyèm edisyon Konbit Soup Joumou : selebre libète nan yon bòl soup

‍Gwoup Konbit òganize senkyèm edisyon « Konbit Soup Joumou » lendi premye janvye 2024 la nan lakou Lycée Nationale de Pétion-Ville la. Aktivite sa a, daprè òganizatè yo, se yon fason pou selebre fratènite, souvrènte ak lespwa nan mitan ayisyen, pandan y ap ede pwoteje tradisyon soup joumou an nan dat endepandans lan, ki gen anpil enpotans nan listwa peyi a. Ane sa a, konbit la te fèt anba tèm « Yon bòl soup joumou, yon rapèl libète ». Moun nan divès kategori ak domèn nan sosyete a te prezan.

Gwoup Konbit se yon regwoupman jèn fanm ak jèn gason ki kwè tèt ansanm ak solidarite nan transparans, se solisyon pou mete Ayiti sou yon lòt ray. Aktivite Konbit Soup Joumou a « Se yon inisyativ ki vize mete Ayisyen ansanm nan yon jou spesyal konsa, epi selebre senbòl sa a soup joumou an reprezante a, yon fason pou nou montre fòs zansèt nou yo epi rann yo fyè » daprè Andy Vibert ki se youn nan manb Gwoup Konbit. 

‍

Konbit Soup Joumou ki te lanse depi nan lane 2018, te komanse an Janvye 2019 nan Vivy Mitchel, men li pat rive fèt an 2020 akoz pandemi kowonaviris la. Lokal Ayiti Kominotè te resvwa dezyèm ak katriyèm edisyon yo an 2021 ak 2023, alòske an 2022 aktivite a te fèt nan Pèleren. 

‍

Responsab Kominikasyon senkyèm edisyon an Doktè Cassandra Jean François te pran lapawòl pou presize ane sa a, konbit Soup Joumou an Nasyonal « Gen konbit Soup Joumou Pòtoprens, Okay, Okap, Forèdèpen, Pòdepè, Miaragwàn, ak nan 3 sit nan Site Solèy ». Li te rapouswiv pou di « Inisyativ konbit soup joumou sa yo vize bay plizyè santèn moun yon bòl soup, ki reprezante yon bòl libète. Nan Gwoup Konbit nou kwè okenn ayisyen pa dwe gen difikilte pou bwè yon bòl soup joumou yon premye janvye ». Konbit Soup Joumou se yon okazyon pou reyini ayisyen, pou fè rezotaj, pou jwe ansanm, men sitou pou manje ansanm epi raple kisa ayisyen vo toujou dapre Doktè a.

Sulzaire Samus St-Vil ki se kowòdonatè komite a pou ane sa sou bò pa l, te pwofite souliye bon kolaborasyon ki te genyen nan mitan ekip la pou rive reyalize aktivite sa a pandan li fè konnen volonte yo se pataje plizyè milye bòl soup ak Ayisyen, nan ide pou selebre endepandans lan jan sa dwe fèt. Pou katriyèm edisyon an, anviwon 1450 moun te rive bwe soup daprè chif responsab yo te pataje, alòske pou ane sa a yo rive pataje soup joumou ak plis pase 5 mil moun nan anviwon 9 sit nou te site yo .

‍

Louino Robillard ki se youn nan fondatè Gwoup Konbit fè konnen, rèv yo atravè aktivite sa a se ede chak grenn ayisyen yon jou gen posiblite pou bwè yon bòl soup san li pa oblije peye pou sa. Pou rive òganize senkyèm edisyon an, komite aktivite a te rive kolekte nan espas yon mwa ak kèk jou, don nan men anviwon 203 moun ki te mete men tankou jan sa fèt chak ane pou rann aktivite sa a posib. Se 1 milyon 272 mil 60 goud yo te rive ranmase.

‍

Aktivite sila te fèt an prezans Harry Nicolas « Mèt Fèy Vèt », yonn nan vizaj moun plis konnen nan zafè pwomosyon pou pwodwi lokal. Li te gide moun ki prezan yo nan yon dividal jwèt tradisyonèl pou te rann moman an pi espesyal. Anpil timoun, jèn moun, granmoun te patisipe nan selebrasyon kiltirèl sa. 

‍

Mèt Fèy Vèt te pran lapawòl pou pale de enpòtans Soup joumou kòm manje « Dapre yon rechèch Bahina Bellot, yon soup joumou gen ladan ase nitriman pou kenbe yon moun pandan 7 jou. Soup Joumou se yon manje ki bay anpil enèji. Se Madan Desalin Marie-Claire Heureuse Félicité Bonheur ki prepare soup sa a nan jan nou konnen li a, pi konplè pase pa ewopeyen yo, nan sousi pou ede sòlda yo gen ase enèji pou batay. Se yon manje ki gen anpil asid ».

‍

Nan kad aktivite sa a, te genyen tou ekspozisyon kèk pwodwi lokal tankou kremas, tablèt ak savon ki fèt ak eleman natirèl. Nan sousi pou te rann jounen sa a pi memorab, responsab yo te envite plizyè atis vin pèfòme. Bagèt Sant Dans Ayiti te kòmanse pèfòmans yo ak yon koyegrafi. Men te genyen tou Douglas Zamor, Fondasyon Frè Luckson Zòn pa fè moun, Atis Vava, Dj Kemissa, Gwoup Jess Collection ak La Bande à Pipo ki te anime piblik la nan fason pa yo. Patisipan nan konbit sa a pat kache satisfaksyon yo, kèk nan yo ki te pale ak nou kwè, se yon inisyativ ki dwe kontinye fè chimen li.

‍

Responsab Gwoup Konbit yo te pwofite moman sa a pou onore komite katriyèm ak senkyèm edisyon an pou bon travay yo reyalize epi remèt yo meday epi sètifika. Onè yo pat ale sèlman pou manm komite yo, men tou pou 2 moun an patikilye. Samuel Polydor Accius « SPA » ki se PDG Spattiude, te resevwa yon plak onè ak merit pou fason li toujou akonpanye Gwoup Konbit sitou nan zafè kreyasyon kontni dijital. 

‍

Frè Luckson Jean te resevwa dezyèm Pri Sabina C. Robillard pou bon travay l ap reyalize atravè Fondasyon Frè Luckson Zòn Pa Fè Moun nan. Pri sa a kreye pou onore memwa Sabina C. Robillard, ki se madanm Louino Robillard, ki te enplike li nan anpil aktivite sosyal avan lanmò li an novanm 2022.

‍

Konbit Soup Joumou se yon fason anplis pou Gwoup Konbit raple kijan tèt ansanm ak solidarite ka ede Ayisyen bay Ayiti yon lòt oryantasyon. Inisyativ sa a mete an valè lidèchip ak kolaborasyon òganizatè yo, ki deja bay randevou pou lane k ap vini.

‍

Merck'n Sley Suprême Jean-Pierre