Teke mab: Yon plezi transjenerasyonèl

Teke mab: Yon plezi transjenerasyonèl

‍Jiskaprezan, pèsòn pa konnen vrè orijin jwèt mab. Men nan kòmansman 3èm Milenè, yo te dekouvri pi ansyen mab la an Ejip, sa ta ka genyen 6 000 ane. Nan istwa Ejiptyen yo, yo te konn antere mò yo ak grenn mab nan tonm yo. Mab sa yo te fèt an ajil. Premye kote yo te dekouvri jwèt mab la se nan zòn Lagrès antik, e sa a toujou poko klè ; objektif jwèt la se te lanse yon maksimòm mab posib anndan yon twou.

Jwèt sa a egziste depi lantikite. Tras li parèt an Ejip, Lagrès, ak Wòm. Sit akeyolojik yo retrase pèp sa yo te konn jwe mab yon fason ki sanble ak fason jwèt sa kontinye jwe jiskaprezan. Se yon jwèt ki parèt senp, men ki gen kapasite pou kaptive moun tout laj. Jwèt mab se youn nan divètisman ki reziste a chanjman epòk yo e ki toujou la pou pote amizman ak kè kontan.

‍Yon jwèt plen estrateji

Se vre, teke mab kapab parèt senp, men se yon jwèt ki plen estrateji, presizyon ak konpetans. Jwè yo dwe pran leswen kalkile chak tèk, pandan y ap teni kont de fòs, ang, aliyman ak trajektwa tèk la. Anplis, dispozisyon mab yo anndan sèk la kapab kreye obstak oubyen defi anplis, sa ki ajoute nan jwèt la yon dimansyon estratejik. 

‍Jwèt la kòmanse avèk yon jwè ki teke mab li dèyè lòt mab ki plase jeneralman nan yon ti distans. Tèk yo jeneralman gen kòm objektif pou frape mab jwè advès yo, tonbe nan twou, osinon retire youn oubyen kèk mab nan wonn nan. Pou sa a, jwè yo dèfwa, chanje fason yo teke oubyen pozisyon yo, pou yo kapab jwenn yon meyè aliyman pou frape mab advèsè a, retire mab nan wonn nan osinon tonbe nan twou.

‍Jwèt mab

Pami jwèt mab ki pi popilè yo, an Ayiti nou kapab konte de. Youn se Twou. Li menm pou jwe li, dwe gen yon twou ki deja fouye, epi chak jwè yo ap jwe ak objektif pou tonbe nan twou a. Moun ki tonbe nan twou avan yo, ap kite jwèt la paske yo deja genyen. Sèl moun ki pa rive twonbe nan twou a pèdi jwèt la, epi li pral resevwa zikòs. 

Dezyèm jwèt la se Wonn, prensip jwèt la se mete yon kantite mab nan yon wonn ki deja trase avan jwèt la kòmanse. Chak advèsè ap mete menm kantite mab nan wonn nan. Prensip jwèt la se teke nan wonn pou frape lòt mab yo pou kite wonn nan. Si mab jwè ki teke a pa rete anndan wonn nan, li ap kontinye jwe pandan l ap konsidere chak grenn mab li teke yo kòm yon gen. Si mab jwè ki teke a rete anndan wonn nan, prensip jwèt la konsidere li kòm mò, ki vle di li pa ka kontinye pati a. 

‍Yon jwèt plis pase yon pas tan

Teke mab plis pase yon senp pas tan. Se yon jwèt ki selebre yon espri konpetisyon, kamaradri ak bèl plezi. Se yon ansyen tradisyon ki kontinye ap pote plezi pou plizyè milye moun atravè monn nan, ak prensipalman an Ayiti. 

Se yon jwèt ki travèse baryè jenerasyonèl ak kiltirèl. Li favorize konpetans tankou konsantrasyon, san fwa, estrateji ak jesyon fistrasyon an ka defèt. Teke mab rete tankou yon patrimwàn pou chak kilti li egziste, ak chak pèp ki pran plezi ladan. Se yon sous plezi ki pote ladan li anpil bèl souvni ki kab konekte yon moun ak anfans li.

Shesly Python

‍